Envía a túa opinión
"A historia que vos queremos contar aconteceu nun deses lugares moi pequenos,...". Comeza dese xeito Bicharada, o espectáculo de Berrobambán que relata con humor intelixente a reivindicación da diferencia. Un escaravello, unha formiga e unha araña xogan nun decorado moi plástico, cunha linguaxe dramática contemporánea, e unha escenografia e iluminación moi traballadas. Evaristo Calvo dirixiu a obra, interpretada por Anabell Gago, Chiqui Pereira e Paula Carballeira.
Envía a túa opinión
“Unha novela de esperanza, que anima a loitar polo que un quere”. Deste xeito describe Yashmina Shawki, viguesa de orixe iraquí, a súa obra Fundación Libélula, que chega esta semana ás librarías da man da Edicións Xerais. Unha mensaxe que mesmo se pode adiviñar polos títulos de algúns capítulos como Ás veces as cousas empeoran antes de mellorar ou A pesar das adversidades hai que seguir loitando.
Envía a túa opinión
Situámonos no ano 98, en Compostela onde o activo Marco Maril crea Dar Ful Ful. Un proxecto de pretecnoloxía musical que dá como froito en 1999 a., o seu primeiro Ep editado por Splat, o seu propio selo, co que tamén gravarían Don Nadie; Hemisferio Izquierdo, o proxecto paralelo de Marco; Traje de Saliva e Cielito Lindo. a. recolle cinco temas nos que Marco condensa experimentación, minimalismo e ambientación cinematográfica. Entre eles o onírico “M&M” e “Películas en el pelo”. Este primeiro traballo foi tan só un aperitivo do que chegaría máis tarde. O camiño en solitario de Marco Maril cruzaríase ese mesmo ano co do catalán Xavier Font e Dar Ful Ful convertese en dúo. A formación comeza a traballar o seu son para dar forma ao que sería o selo de identidade: pop intimista, elegante e sinxelo.
Envía a túa opinión
A comisaria da mostra buscou nos arquivos fotográficos de Pacheco ou de Ribadavia. Quería reflexar a apariencia da infancia. Recolleu imaxes de nenos mortos de finais do século XIX e comezos do XX. O resultado amósase nun apartado da exposición que se pode visitar ata o 24 de abril no Centro Cultural Torrente Ballester de Ferrol. A mostra chámase “Falsas apariencias. Miradas fragmentadas sobre a infancia”. Propón un diálogo entre artistas clásicos do século XIX ou comezos do XX e as propostas máis contemporáneas.
Envía a túa opinión
Despois da boa acollida da I Gala Solidaria de Cómicos Galegos a favor do pobo haitiano, Intermón Oxfam organizou para mañá sábado, 5 de febreiro, unha segunda edición na que a seguridade alimentaria de rexións como Tanzania será a protagonista. Danny Boy-Rivera, David Amor, Gari, Isabel Risco, Marta Lado, Oswaldo Digón e Rober Bodegas, comandados por Belén Regueira, serán os humoristas encargados de facernos gozar dunha noite única, na que a risa e o bo humor serán os protagonistas. O evento arrincará ás sete e media da tarde no Palacio da Ópera da Coruña. As entradas xa están á venda ao prezo de 10 euros e poden adquirirse no Quiosco da Praza de Ourense, na web de servinova, no teléfono 902 504 500 ou o día da gala na propia billeteira do Palacio da Ópera.
