Unha carta redactada por María Gomez Díaz levou o premio do certame de cartas de amor de Radio Fene. A persoa gañadora recibirá unha cea e unha estancia dunha noite no Hotel Pazo Libunca de Narón. María Gómez Díaz é veciña de Castro de Ribeiras de Lea (Castro de Rei Lugo) e traballa como tradutora e profesora en Ponferrada. Indica que se ten presentado hai anos a un concurso de relato curto dunha editorial basca, pero que ela adícase á tradución.
A misiva gañadora relata o sofrimento provocado por unha relación amorosa que non responde ás expectativas criadas. O xurado valorou o aspecto de irracionalidade e de sofrimento causado polo amor, e a intensidade dos sentimentos transmitidos. O xurado, presidido pola profesora de Historia do Instituto de Ensino Secundario de Canido (Ferrol) Carmen Cuesta, tamén decidiu conceder un accesit á carta presentada polo ferrolán Francisco Maceira. O certame de cartas de amor de Radio Fene cumpreu 13 anos de vida. Tamén formaron parte do xurado o alcalde de Fene Gumersindo Galego e as concelleiras Rocio Bértoa, Rita Couto e Carmen Silvar.
Texto da carta gañadora:
Sufro porque despertei despois de moito soñar.
Sufro porque camiño soa e non me das a man;
porque preciso amor fora da cama,
porque eu subo e ti baixas,
porque ti falas mandaríne eu grego clásico.
Sufro porque non vexo o teu sufrir.
Sufro porque son como son
e por escribir isto.
Sufro, aínda, á maneira do Sturm und Drang,
do maldito romanticismo.
Sufro porque non entendes estas palabras
e porque calas e non falas.
Sufro, en fin, porque non te sei deixar,
porque deixarte me fai sufrir máis.
