A Xunta permitirá a construción fronte ao mar trala fase de audiencias do novo ordenamento costeiro, deixando obsoleta a prórroga da prohibición de edificar nunha faixa de 500 metros decretada polo goberno bipartito, que concluirá o día 17 de maio. O Consello da Xunta coñeceu hoxe o documento previo á aprobación do novo Plan de Ordenación do Litoral de Galicia que inicia desta maneira o seu procedemento administrativo. Agora o texto será remitido aos concellos afectados para que fagan as súas achegas e o Goberno anunciou que pretende conseguir o máximo consenso político antes do visto bo definitivo, que segundo as previsións terá que chegar en decembro deste ano. Mais isto non impedirá que antes se aproben levantamentos excepcionais dos límites á construción.
O conselleiro de Medio Ambiente e Territorio, Agustín Hernández declarou que haberá máis de 45.000 hectáreas con máxima protección ambiental, por ser zona intermareal e costeira, e que representan o 21 por cento do territorio contemplado no plan. Con todo, son 40.000 menos que as que fixaba a Lei de Medidas Urxentes do bipartito. No resto da faixa inmediata ao mar caberá a posibilidade de edificar en función do impacto paisaxístico porque, segundo Hernández, “ordenar o litoral non é igual a prohibir”.
O novo Plan de Ordenación do Litoral, segundo a Xunta, centrará a súa xestión no 7,2 por cento da superficie total da comunidade, isto é, 212.164 hectáreas,130.000 máis que o documento actual. Hai 84 concellos incluidos no Plan: 47 na provincia da Coruña, 10 en Lugo, e 27 en Pontevedra.
Polo súa banda, o presidente Alberto Núñez Feijóo declarou que cómpre desenvolver a ordenación de acordo ás necesidades do Plan de Acuicultura e teimou en que as intervencións permitidas pola Xunta atenden ao “interese xeral”. Desta maneira, os plans da Xunta para a macropiscifactoría de Touriñán non dependerán do novo ordenamento, senón que prevalecerá a norma sectorial.
