O Centro Tecnolóxico Agroalimentario de Lugo (CETAL) conta cun organismo mais dentro do seu organigrama, xa que a Plataforma Tecnolóxica Galega Agroalimentaria (PTGAL) aceptou formalmente a proposta de incorporación e traslado da súa sede á do CETAL.
O Centro Lugués ofreceu á Plataforma Tecnolóxica Galega Agroalimentaria, na súa proposta de adhesión, poder contar con esta Fundación para formalizar o oportuno soporte xurídico e administrativo para o seu normal funcionamento. O director do CETAL, Eduardo Vidal, explicou que a proposición foi moi clara en canto ao interese da Fundación en “reforzar a cooperación de cara a mellorar as actuacións posibles que a ámbalas dúas entidades teñen en común”, neste caso potenciar o impulso significativo no campo da I+D+i agroalimentaria, entre outras.
Vidal Baamonde quixo engadir que “entendendo que unha Fundación de interese público, como é o CETAL, debe prestar e facilitar actuacións e servizos transversais, tendentes a complementar e optimizar os xa existentes”.Así, o Centro Tecnolóxico Agroalimentario de Lugo comprometeuse ademais a acoller a sede e a Secretaría Técnica Agrogandeira da PTGAL e pór á súa disposición os medios materiais necesarios para levar a cabo as súas funcións. Outros dos compromisos aceptados polo CETAL serán administrar os fondos e subvencións que a Plataforma acade para o desenvolvemento da súa actividade, cofinanciando con fondos propios do CETAL; así como participar de forma activa nas actividades da PTGAL, particularmente nos proxectos institucionais promovidos pola Plataforma nos que o Centro lugués poida potenciar sinerxías, tales como INTERREG, o Programa Marco da UE, entre outros.A PTGAL, concretada no ano 1996, é unha entidade integrada por empresas, centros tecnolóxicos, universidades e grupos de traballo do sector público. A Plataforma constitúese nun foro de diálogo permanente entre o sector investigador e o empresarial. Este organismo non posúe personalidade xurídica, polo que os seus órganos, a excepción das secretarías técnicas, non contan con remuneración. Economicamente vese recompensada coa creación de proxectos cooperativos das empresas participantes. Na actualidade, a PTGAL está constituída e participan nos seus proxectos 175 empresas, 54 grupos de investigación e 24 entidades de I+D+i. Neste momento, teñen seis grupos de traballo abertos. Neles participan 83 empresas e 43 grupos de investigación. Tamén teñen iniciados preto de 100 proxectos de cooperación.
