1 comentario/s - Envía a túa opinión
A corporación de Fene demanda a devolución do pazo de Meirás ao patrimonio público. O Concello incorporouse á xunta pro-devolución do pazo. No Pleno celebrado na tarde de onte prosperaron dúas mocións, a primeira consensuada polo goberno municipal co PSOE e Somos Fene. A segunda presentada polos populares completaba á primeira e demanda á Xunta de Galicia que estude unha fórmula xurídica para recuperar a edificación. Aprazouse o nomeamento da persoa que representará a Fene na xunta pro-devolución do pazo. O BNG propoñía ao alcalde ou á concelleira de cultura pero finalmente escollerase en comisión.
Envía a túa opinión
As triatletas ferrolanas, Camila e Melina Alonso, inauguraron esta mañá o programa de prevención da obesidade e contra o sedentarismo "Móvete máis e alimentate mellor" no colexio O Ramo de Barallobre. As dúas atletas falaron diante do alumnado sobre a súa experiencia co deporte na infancia na Arxentina, e sobre as bondades da actividade deportiva nas nosas vidas. Camila Alonso citou en Radio Fene os retos máis inmediatos da súa carreira deportiva. O mundial e os xogos olímpicos de Xapón están no horizonte das triatletas.
Envía a túa opinión
Un veciño de Fene atopou de xeito casual un sobre con 2.000 euros na avenida Marqués de Figueroa. Acudiu a entregar o achádego ás oficinas da Policia municipal. Os axentes examinaron o sobre e comprobaron que tamén incluía unha cartilla dunha entidade bancaria. Fixeron as pesquisas necesarias ata dar co propietario, un home de 80 anos veciño da Rúa Alta en Perlío.
Envía a túa opinión
Cortacéspedes manuais de todo tamaño e condición, cortacéspedes de asento, serras mecánicas, cortasetos, desbrozadoras, sopladores e aspiradoras...Un gran surtido de aparellos para coidar o xardín e as zonas verdes atopamos en Maquigarden unha empresa de recente apertura na estrada da Palma nº 142, nas antigas instalacións de Galerías Otero, en Maniños- Fene.
Envía a túa opinión
O primeiro que chama a atención cando chegas ao número 16 da rúa da Fraga de Fene, esquina coa praza Ramón Souto, é o nome que reza na porta da nova tenda "Un pedacito de mi" cun corazón no punto do i. Dúas mulleres, Belén López e Sandra González, son socias desta nova iniciativa empresarial que apenas ten un mes de vida. A tenda de roupa infantil inaugurouse o pasado 26 de agosto e abríu as portas o luns 28. Por se o nome da tenda non fose suficientemente elocuente, mesmo se entra topamos co lema " Todo comienza con un sueño".
