Un pittosporum ondulatum recibe todos os dias ao alumnado e profesorado do Instituto de Ensino Secundario de Fene. A arbore fálanos do pasado esplendoroso do Pazo de Barallobre.
Unha laranxeira ubicada no lugar dos Arangas en Maniños, na casa do ex alcalde Xose María Rivera Arnoso e a situada na praza da escola de Perlío, son duas Citrus sinensis singulares no término municipal de Fene (A Coruña). A de Perlío trae moitas lembranzas a todas as persoas alumnas da denominada "escola de Peleteiro".
A palmeira da sorte contempla a parroquia de Barallobre e boa parte da ría de Ferrol desde os seus 12 metros de altura. Conta con arredor de 100 anos de edade, segundo os cálculos de Antón Muñiz. O actual párroco Don Elias Seoane, lembra que cando chegou a Barallobre –hai 58 anos- a palmeira xa contaba cun porte similar ao actual.
A palmeira washingtonia de Maniños medra no lugar do Pombal, á beira da ponte do río Baa. Vese con claridade ao circular pola estrada da Palma, na finca do coñecido como muiño de Ignacio. Os seus 30 metros de altura sobrancean neste vial e amosan un bó estado de saúde.