La Sexta, a canle que arrebatara os dereitos da competición e ao seu presentador estrela a Telecinco, sentiuse estafada e, orfo Alonso dun gran rival ou de posibilidades de vitoria, os índices de audiencia caeron tras moitos anos de captación de conversos a ese deporte para geeks que é o das carreiras de velocidade. Mais nalgún momento dos últimos meses, Antonio Lobato matou unha cabra, bebeu o seu sangue dentro dunha estrela de sete puntas pintada no chan e proferiu unhas palabras nunha lingua xa esquecida que só coñecen as serpes. Agora de seguro que non hai xa humanidade baixo ese cranio lirondo, pero a cambio Alonso está en Ferrari; os dous últimos campións do mundo, os dous británicos, comparten equipo e rivalidade; o mito Schumacher volve a un equipo alemán; e ata tres pilotos españois sentan nun volante. O cóctel para rebentar o share das fins de semana está servido e a cadea de Mediapro celébrao cunha reportaxe exclusiva titulada “Fernando en Ferrari, la fábrica de sueños”, que sirve de petisco ao inicio da competición este domingo. Emítese ás nove e media da noite.