Comparacións pódense debuxar as que se queiran para explicar as diferenzas entre o Barça e o Athletic, sendo a máis simple a que fala dos protagonistas de A Bela e a Besta, máis cómpre lembrar que naquela fábula todo xiraba arredor dunha historia de amor, e esta noite o único bico será o dos capitáns antes do sorteo de campo. Logo seguiralle un berro atávico e dúas tradicións futbolísticas tiraranse unha ao pescozo da outra. Sobre o papel todo parece unha cacería deseñada polos leóns vascos para ameazar as gráciles extremidades das gacelas catalás e reeditar as caricias entre Goikoetexea e Maradona de hai 25 anos, pero, como xa teño defendido algunha vez que outra, se o fútbol existe é enfeitiza masas é pola imprevisibilidade. Así que non se pode desbotar que Toquero enganche unha chilena dende fóra da área por máis que a súa coordinación corporal o faga bioloxicamente imposible. Este e outros misterios, como o morbo político de saber que farán as afeccións cando soe o himno español antes do partido, revelaranse na final da Copa do Rei que TVE emite ás dez da noite.