“Imos a polo triplete”, avisou cun símil futbolístico o voceiro do PPdeG, Antonio Rodríguez Miranda, confiando en que conseguirán unha nova victoria electoral en clave local e tamén estatal para culminar o cambio iniciado en Galicia co retorno á Xunta. O portavoz popular afirma que tentarán convertir as “maiorías amplas” que teñen nas cidades galegas -pero que non lles abondan para gobernar- en “maiorías absolutas”.

“Repetir e mellorar” é o propósito que se marcan os socialistas. “Xa gobernamos ao 70 por cento dos galegos e galegas”, fachendea a voceira do PsdeG, Mar Barcón, lembrando a forza socialista nas alcaldías das principais cidades e vilas de Galicia. Barcón coida que “fronte á paralise en investimentos da Xunta”, agora “son os concellos os que manteñen o pulso do país” e dende eles, afirma, “o PsdeG axuda ás familias a saír da crise”.

A crise económica é “o primeiro problema de Galicia”, segundo o voceiro nacional do BNG, Guillerme Vázquez, quen coincide cos socialistas á hora de denunciar “inacción” por parte do Goberno galego. O Bloque coida que os bos resultados autonómicos do PP non teñen por que repetirse a nivel local. Despois dun ano na Xunta, “a cidadanía non ten nada que festexar”, declarou Vázquez en referencia ás celebracións programadas polos populares.