A min a Jolie nin me presta demasiado como actriz, nin tampouco como mito sexual, porque tanta exuberancia resulta difícil de encaixar. Antes si me gustaba como personaxe do novo Hollywood, cando fachendeaba de tatuarse textos cabalísticos, practicar o sexo con tesoiras e coitelos, e alternaba con Billy Bob Thornton. Pero a súa transmutación en Mia Farrow do século XXI, previo matrimonio con celebridade e adopción de toda un xardín de infancia ao que leva en procesión durante as súas misións humanitarias, facendo aparicións mesiánicas en festivais de cine, estalle a matar o sex-appeal a velocidade de cruceiro. O último é que a teremos de veciña, porque disque se lle meteu na cabeza criar aos fillos en Portugal.

Sabendo todo isto, profanar pirámides buscando tótems sagrados entre acrobacias e refachos de metralladora, non resulta algo tan do outro mundo, e iso é o que fai en “Lara Croft: Tomb Raider”, a película que emite La Sexta ás dez e cuarto.