Actividades accesibles nos museos de Lugo

Actividades accesibles nos museos de Lugo

28 de Xuño, 2014 - 12:00 h. | Publicada por Radio Lugo

Obradoiros de pintura, fotografía, muralismo e campamentos de arqueoloxía son algunhas das actividades que se poderán realizar este verán nos Museos de Lugo. Para elaborar o programa, tivéronse en conta as propostas dos membros dos clubs da Rede Museística.

A Rede Museística Provincial, dependente da área de Cultura da Deputación de Lugo, xa ten preparado o programa de actividades estivais que ofertan cada ano os catro museos que a conforman: o Museo de Lugo, o Museo do Mar de San Cibrao, o Museo Fortaleza San Paio de Narla, e o Pazo de Tor. O delegado de Cultura da institución provincial, o nacionalista Mario Outeiro, foi o encargado de presentar este compendio de actividades xunto coa xerente da Rede, Encarna Lago; e a directora do Museo de Lugo, Aurelia Balseiro.

O programa de obradoiros de verán posto en marcha pola Rede Museística ofrece un amplísimo número de actividades, de diversa índole e duración, dirixidas a públicos de todas as idades, a partir dos catro anos, e adaptadas á contorna de cada un dos museos.

Obradoiros de pintura, escultura, gravado, fotografía, muralismo, ourivería, música ou cine; campamentos de arqueoloxía, traballos manuais e artesanais, actividades arredor da gastronomía e a alimentación, ou de aplicación de distintas tecnoloxías, para coñecer mellor o medio e mundo no que vivimos, son algunhas das propostas da Rede Museística para os meses de xullo, agosto e setembro.

Neste sentido, o delegado de Cultura explicou que “para elaborar o programa de actividades que hoxe presentamos tivéronse en conta as propostas dos membros dos clubs da Rede Museística, desde os máis cativos de Pequeamig@s, os mozos e mozas do Club Ei!, ata os máis veteranos do Club Sénior. Todos eles e elas participan ao longo do ano en múltiples actividades nos museos da rede e do seu compromiso e experiencia aprendemos que os museos son motores activos imprescindíbeis para o desenvolvemento social e cultural das comunidades”.
“Desde a área de Cultura e Turismo da Deputación de Lugo e a través dos museos integrados na Rede Museística adquirimos o compromiso de servir á nosa sociedade, de usar os fondos que custodiamos para proveito de todos e todas. Por iso, cada un dos catro museos provinciais, ofrece un programa específico, adaptado ás especificidades dos seus fondos ou colectivos interesados”- precisou Outeiro.

Pola súa banda, Encarna Lago fixo fincapé na implicación tanto da área de Cultura como da Rede Museística no referente á accesibilidade: “cada ano traballamos para que todas as actividades que ofertamos sexan accesibles a todas e a todos, sexan cales sexan as súas capacidades, poñendo á súa disposición todas as  medidas humanas e técnicas necesarias. Neste sentido, este ano, como novidade, e coa vista posta en cubrir as necesidades das persoas participantes que padezan algún tipo de discapacidade mental, deseñamos uns obradoiros relacionando os contidos do noso Museo con musicoterapia, impartidos por psicólogos e especialistas na materia”.

Sociedade