A actual concelleira de Inmigración e Cooperación, Angélica Gomes Sanches é burelesa de nacemento mais filla de inmigrantes de Cabo Verde dos que chegaron ás nosas costas alá por finais da década de 1970. A familia de Angélica estivo sempre vinculada ao mar, sendo como é filla de mariñeiro agora retirado, que tras ter pasado polas obras da pranta de Alúmina, hoxe Alcoa, en San Cibrao, dedicouse á pesca do bonito, á que ía todos os anos. Angélica ten bos recordos desde pequena da Feira do Bonito, lembra que poñían "vestidos de domingo" e pasaban o día fóra disfrutando da efeméride. Dende entón ata a actualidade, a expansión da Feira e da afluencia de público a ela foi máis que apreciable. A concelleira cre que a comunidade caboverdiana vive dun xeito especial a Feira do Bonito pola vinculación directa da maioría das familias coa pesca, e que o primeiro que lles piden cando visitan outras xeografías nas que teñen familiares, son os botes deste peixe. "É algo que lles encanta".