O Pleno de Fene aprobou onte, por unanimidade, dúas mocións. Unha da asociación "Querendo mulleres en Endometriose" que reclamará ao Sergas e ao Ministerio de Sanidade unha maior atención ás mulleres afectadas por esta doenza, a creación dunha Unidade multidisciplinar, a gratuidade dos medicamentos ou un Plan estatal de formación de profesionais. Demanda dos concellos unha campaña de información nos centros de ensino. Fene adheriuse tamén á conmemoración do "Día Internacional da Nena" o 11 de outubro, que pretende visibilizar a doble discriminación das nenas por razón de sexo.

Os grupos da oposición coincidiron en que o pleno real durou un minuto, para criticar a falta de propostas do goberno bipartito de PP e Somos Fene. O alcalde responde que este mes se celebrará un pleno extraordinario para aprobar asuntos relevantes que non estaban preparados aínda. Referiuse ás Ordenanzas municipais, entre outros. A limpeza do río Cádavo, a maleza en San Valentín ou a homenaxe a Sito Sedes foron temas recurrentes no apartado de rogos e preguntas. O goberno anunciou que se quere poñer unha beirarrúa enriba do muro de contención do río Cádavo en Perlío, daí que se estea modificando o proxecto e se parasen as obras temporalmente.

O BNG insistiu en que hai que convocar unha nova bolsa de conserxes porque a anterior caducou e criticou que se olvidaran de Neda no estudo económico do Punto Limpo. Interesouse tamén pola concesión da cafetería do pavillón A Xunqueira.

O grupo socialista recalcou o deterioro dos parques infantís feneses que carecen de certificación e hoxe en día son inseguros. Tamén na necesidade de repor losetas en moitas beirarrúas municipais e na urxencia de regular o aparcamento dos autobuses escolares no IES de Fene. Respondeu o grupo de goberno a isto último que xa se encargou un proxecto e que se están recollendo suxerencias coa dirección do centro.

Por último, EU preguntou sobre a recollida de voluminosos nun punto de Sillobre onde os residuos pasaron quince días esquencidos na rúa. Os portavoces dos grupos políticos municipais fixeron declaracións ao remate da sesión plenaria.