Tres xeracións de músicos conforman A Banda das Crechas. Tan só dous dos seus membros, o gaiteiro Manuel Amigo e Quim Farinha no violino, están na formación desde o seu comezo. O colectivo ten unha banda base e tamén conta con outros músicos ocasionais que o van enriquecendo. Segundo comentou en Radiofusión un dos integrantes do grupo, Xan Pampín, a idea de sacar o disco xurdiu da necesidade de “legar o amplo repertorio da banda”.

O traballo gravouse ao vivo nunha soa xornada. En total foron seis horas de directo, tres a porta pechada e tres con público. Deste xeito, os 13 primeiros temas saíron da gravación inicial sen espectadores e nos dous últimos percíbese o ambiente propio das foliadas que fixeron famosa a Casa das Crechas.

O álbum é, precisamente, unha homenaxe a este espazo compostelá, “un lugar de encontro e paixón”, como o describen desde a banda.

Os 15 temas do disco ABDC están gardados en formato digi-pack de cartón cunha presentación qeu inclúe un libreto explicativo con imaxes do grupo, letras e textos en 3 idiomas (galego, español e inglés).