“Parece mentira, pero en moitos lugares do mundo non saben que existe Maniños” afirmou esta mañá a escritora, actriz e contacontos Paula Carballeira. A autora comprometeuse a divulgar o nome e a existencia da parroquia nas súas viaxes, nos seus percorridos polos diferentes continentes. Manifestouno así no acto de inauguración da biblioteca do colexio Os Casais de Maniños, celebrado este mediodia.

O centro educativo e máis Paula Carballeira medraron a un tempo,  segundo explicou esta mañá a escritora cunha cara chea de felicidade. Non sei se o merezo pero estou moi orgullosa, afirmou Carballeira. O director dos Casais Alvaro García agradeceu a Paula que ceda o seu nome para a biblioteca. Indicou que é escritora, contacontos, actriz de teatro e de televisión, absolutamente polifacética. Alvaro García agradeceu a toda a comunidade educativa a participación nas actividades da biblioteca. O alumnado de cuarto de educación primaria preparou diferentes discursos que pronunciaron diante do público que enchía o salón de actos dos Casais. “A nosa biblioteca é a maís divertida e organizada que vín”. “De maior gostaríame ser escritora”. “Se dixeran que nos pechan a biblioteca, non sei que cara poñería” foron algunhas das manifestacións de alumnos e alumnas. A responsable da biblioteca Maribel Serantes explicou as actividades de animación lectora e as mochilas viaxeiras, entroutras iniciativas que nacen da biblioteca. O alcalde de Fene Iván Puentes indicou que as bibliotecas son espazos de sabiduría e significan o esforzo de moitos anos e de moita xente. “Isto demostra que o centro está vivo, e por iso lle desexo unha longa vida á biblioteca e ao colexio” afirmou o primeiro rexedor.

Despois dos discursos, o alumnado, o profesorado e o público subiu á biblioteca onde riron a cachón coas historias que contou Paula Carballeira. A gata Micabigotes e o rato Gordecho tamén se rian desde un recuncho da biblioteca. Son as mascotas que guian a nenos e nenas dos Casais polas aventuras que nos contan nos libros.