En liña coas conclusións aprobadas nos Encontros anteriores, serán presentadas as propostas e accións dos colectivos e organizacións comprometidos coa defensa da educación no rural, e dedicarase un amplo espazo para a presentación de experiencias educativas, proxectos, recursos innovadores e/ou estudos e investigacións sobre distintos aspectos relacionados co medio rural.

Co obxecto de poñer en valor o potencial educativo do medio rural, aproveitarase didacticamente as experiencias desenvolvidas en diferentes centros de Galicia, ao tempo que se buscará a perspectiva que, sobre a realidade actual da educación no medio rural, teñen diferentes especialistas.

O programa elaborado quere, unha vez máis, darlle valor e visibilidade ao traballo daqueles colectivos e entidades preocupados e ocupados na mellora da educación no rural. Por este motivo convidámosvos a participar neste IV Encontro compartindo cos participantes e con Nova Escola Galega as vosas achegas, no marco das actividades previstas.