A dificultade para conciliar o sono e a ansiedade son problemas psicolóxicos que poden xurdir no confinamento. Partindo da máxima de que “A dor é inevitable, o sufrimento é opcional” , o psicólogo José Barcia explica que en situacións extraordinarias como esta é moi común que cometamos o erro de irnos á cama  “enganchados” aínda ás noticias que lemos nos móbiles ou nas redes sociais. “É preciso desconectar ao deitarte, irse á cama con sosego” reitera Barcia, quen recomenda a desconexión a través de exercicios de relaxamento. Hai métodos, di, que funcionan. “O caso é levar a cabeza a outro lugar” sentencia.

A rapazada de ata 14 anos poderá saír desde o domingo dar un paseo, segundo a nova norma do goberno. Con ese motivo fala Barcia dos trastornos máis habituais entre adolescentes en situacións como esta do confinamento que estaría relacionado coa ansiedade. Por suposto inflúe, afirma, a súa personalidade, a capacidade das familias para explicarlle a situación e como esta se vive na casa, se un hai ambiente positivo ou non. A ansiedade pode quedarse nun episodio consecuencia das circunstancias que están a vivir , pero se permanece ou se repite habería que tratalo profesionalmente.