A camiñar en primavera...

A camiñar en primavera...

30 de Marzo, 2009 - 12:00 h. | Publicada por Radio Fene

O Concello de Fene pon en marcha un novo programa de marchas de sendeirismo de primavera. Nesta ocasión os percorridos desenvolveranse pola Fervenza do Belelle (o 18 de abril), pola rota do Mosteiro de Aciveiro-Candán (o 23 de maio) e pola rota circular de Tordoia (o 13 de xuño).

Practicar deporte á vez que se coñecen distintas paraxes tanto de Fene coma doutros municipios galegos, son os principais obxectivos do programa de marchas de sendeirismo de primavera que organiza a Concellería de Mocidade, Deporte e Ocio. O prazo de inscripción para a primeira xa está aberto. Segundo o monitor Eduardo Lourido, a do Belelle é unha rota de dificultade media con grandes atractivos como a propia fervenza, a fraga ou a canle do río. A principal dificultade do percorrido é a subida a Marraxón, ao punto máis alto do monte, coñecido coma o Coto do Rei.         

Logo desta primeira saída polo Belelle, prevista para o vindeiro 18 de abril, dende o Concello de Fene anúncianse novas marchas o 23 de maio e o 13 de xuño, percorrendo as rotas circulares do Mosteiro de Aciveiro-Candán (no concello de Forcarei) e a de Tordoia, nunha localidade próxima a Ordes.
        

Como único requisito para participar nas marchas de sendeirismo de primavera de Fene, hai que ter unha idade mínima de 12 anos ou ir acompañado, no caso dos menores, dun adulto. As inscripcións entregaranse nas dependencias administrativas da Concellería de Deportes, na Avenida Naturais, 44, entrechán dereita, de Fene. Para máis información pódese chamar ao teléfono 981-340366

Sociedade