“É unha responsabilidade grande, xúlganse delitos graves normalmente, temos que ser independentes, responsables, guiarnos pola lei, hai que manter o segredo das votacións, ser imparcial e dilixente”, advirte a letrada. Responsabilidade que asumen as persoas integrantes do xurado. A elección sae dun sorteo. Cada dous anos faise unha lista de persoas. Proporciónalla á Xustiza a Oficina provincial do Censo Electoral.  A avogada Álvarez Real explicou que as listas confecciónanse por partidos xudiciais, para evitar grandes desprazamentos ás persoas designadas. Formar parte dun xurado é unha obriga cidadá. Incompatible para persoal da Xustiza, avogados e procuradores. Tamén poden librar desa responsabilidade persoas maiores de 65 anos, quen teña cargas familiares ou quen xa servira como xurado nos catro anos anteriores. E está prohibido para quen teña interese nos feitos ou os coñeza de preto.