A reagrupación do alumnado xa viña sendo unha práctica habitual nas escolas, segundo a Administración, máis o responsable de Ensino do sindicato nacionalista salienta unha diferenza fundamental: “Sempre era co beneplácito do propio profesorado do centro. Estamos a falar de que os regrupamentos ou desdobramentos débense facer tendo en conta a opinión do equipo docente, porque o profesorado é o que está capacitado para decidir”, explicou Anxo Louzao a Radiofusiòn. O representante do corpo de mestres critica que Educación faga da circular unha orde taxativa sen considerar as particularidades do alumnado: “Non se pode aplicar un número sen ter en contra outros condicionantes: pode haber alumnado que precise apoio, alumnado repetidor, alumnado con características específicas ou necesidades educativas especiais. Todo iso hai que telo en conta á hora de conformar os grupos”.

O martes hai unha xuntanza da mesa sectorial do ensino e, malia que o asunto non figura na orde do día, a CIG pensa suscitar o debate arredor do mesmo e demandar da Xunta unha negociación previa á aplicación da medida. Ademais, se a Administración decreta a reagrupación, Anxo Louzao reclama entón que tamén regule o desdobramento: “A ratio máxima en infantil e primaria é de 25 alumnos, e en ESO é de 30, e hai cursos que a superan se hai repetidores porque estes non contan á hora de reagrupar o alumnado. Aí si hai demanda dos centros de facer dun curso dous. Pero o que temos é unha imposición que vai en sentido contrario”.