En Santiago de Compostela suspendéronse as 54 operacións previstas. Os pasaxeiros facían longas colas diante dos mostradores de Aena para presentar as oportunas reclamacións. Tamén se cancelaron os 18 voos previstos na Coruña. Alí os viaxeiros indignados recorreron ás empresas de aluguer de vehículos sen condutor en procura de medios de transporte alternativos.

O mesmo panorama albiscábase esta mañá no aeroporto de Peinador en Vigo. Alí presentáronse máis de 300 reclamacións esixindo o reintegro do importe dos voos contratados. Aos viaxeiros con billete a Barcelona, a compañia aérea ofrecíalle a posibilidade de trocar o voo por un avión que sairá mañá domingo ás 10 da noite.

Por outra banda o fiscal do Tribunal Superior de Xustiza de Galicia Carlos Varela ordenou á Policia Nacional e á Garda Civil iniciar investigacións por se puidese haber indicios de delito na actitude dos controladores aéreos. Mentres tanto a Asociación Galega de Hostalaría cualifica como dun auténtico caos a situación, "con moitas cancelacións e innumerables hospedes que non se puideron presentar en hoteis e casas de turismo rural".