A Concellería de Promoción Económica acaba de poñer en marcha en colaboración co Galp Golfo Ártabro Norte e da Confraría de Barallobre o proxecto "O sabor do mar na túa mesa", co que se queren promocionar o sector marisqueiro e hostaleiro de Fene, dous dos máis afectados pola crise derivada da pandemia. A iniciativa promove que os restaurantes oferten menús con materia prima da ría e, ao tempo, favorecer que nos fogares se aposte pola ampla variedade de produto -especialmente no Nadal- que colleita e depura o pósito de Barallobre. Esa oferta está xa recollida na web http://turismo.fene.gal/sabores/ a través da que é posible facer reservas e encargas. Os locais de hostalería que colaboran no proxecto tamén ofrecen unha degustación de produtos da Lonxa de Barallobre á súa clientela co obxectivo de que se valore a súa calidade en comparación co marisco procedente doutras latitudes.

Tal e como sinala a concelleira responsable municipal de Promoción Económica, Ana Basoa Rioboo, o proxecto "O sabor do mar na túa mesa" insiste, unha vez máis, en que "neste Nadal e en calquera outra época do ano o mellor é consumir produto de proximidade, comprado fresco na lonxa ou convertido en pratos exquisitos elaborados polos restaurantes locais que, ademais, neste momento ofrecen comidas e ceas para levar". A relación de establecementos que se sumaron á campaña -máis ben sinerxía entre hostalaría e confraría- pode consultarse na web de Turismo de Fene. Trátase da propia confraría Santiago Apóstol de Barallobre, O Son de Cociña, o Café Beiramar, La Casa de la Abuela, o Encontro de Leo e o Mesón de Feal. Na web atoparemos o teléfono e a localización, xunto con accesos directos ás súas redes sociais e tamén á carta descargable, fundamental para facer pedidos. Ademais, desde o proxecto “FENE MAR VIVO II”, co apoio do Galp, da Confraría e da Concellería de Promoción Económica, sortearanse 40 ceas para dúas persoas entre a clientela destes locais.