Poderá participar neste certame todo o alumnado matriculado en calquera dos centros de ensino, públicos ou concertados, de Ferrol e aqueles centros que forman parte da Coordinadora de Equipas de Normalización Lingüística. As persoas participantes deberán presentar unha composición plástica orixinal elixindo entre as modalidades de debuxo, pintura, colaxe ou fotografía e para a realización da súa obra deberán escoller, como motivo de inspiración, unha das 15 propostas poéticas da literatura universal recollidas no anexo das bases (o autor ou autora deberá indicar o texto seleccionado e esta autoría terá que ser individual). Entre as propostass atópanse versos de Manuel Rivas, Lois Pereiro, Noriega Varela, Álvaro Cunqueiro, Joan Margall (en catalán), Katherine Mansfield (en lingua inglesa), Aleksandr Pushkin (en ruso) ou Cesare Pavese (italiano). Tamén se inclúen versos en lingua alemana ou persa, entroutras.
Os centros participantes desenvolverán as súas actividades en dúas fases: centros e intercentros. Na primeira delas realizaranse actividades que relacionen o mundo da expresión poética co da expresión plástica e será o centro o que selecciona unha única obra por nivel educativo para participar na segunda fase. Os orixinais seleccionados deberanse enviar antes do 23 de marzo ao seguinte enderezo: Equipo de Normalización Lingüística. IES Concepción Arenal. R/ Cuntis, 1. C.P. 15.402. Ferrol.
O Concello e a Coordinadora de Equipos de Normalización Lingüística nomearán un xurado que elixirá, de entre as obras seleccionadas para a fase intercentros, un máximo de trinta traballos atendendo a criterios como a calidade estética, orixinalidade e a interrelación entre a linguaxe poética e a linguaxe plástica. Ademais, garantirá que cada nivel estea representado por un mínimo de cinco obras sempre que cumpran os criterios establecidos nas bases, podendo declarar o certame total ou parcialmente deserto.
O Concello de Ferrol realizará, coas obras seleccionadas, unha exposición pública no mes de maio, que estará a disposición dos centros educativos de Ferrol e comarca.
