A rúa é o espazo máis determinante onde todo o mundo está convidado a contemplar os espectáculos ao ar libre. Desde hai unha semana tamén se celebra o IV Festival de Maxia da Coruña que inclúe todo tipo de actividades e obradoiros.

Destaca o espectáculo Maxia para cegos, onde un ilusionista chileno crea un espazo onde están presentes todos os sentidos agás o da vista. O público entrará e non verá nada pero o resto de sentidos estarán en “estado de revista”. Unha ocasión moi especial para contemplar un espectáculo polo público e restos de magos.

A semana acollerá dúas galas, o cumio do congreso para os congresistas e para a cidade. A Gala Grandes Premios da Maxia conta con moita significación “Non son os números uns, son os que están por riba do normal”, declarou en Radiofusión un dos organizadores, o Mago Antón. Alí reuniranse moitos dos grandes máxicos dos últimos 30 anos. Sobrancea a presenza de John Calvert de 99 anos.

Os congresistas xuntaranse no Palexco, para charlar e percorrer a traxectoria da maxia con Calvert e Juan Tamariz. 700 magos escoitando, un momento sublime e inesquecible, describiu o Mago Antón.

Outro dos atractivos será o Barco Máxico de Juan Tamariz. Esta actividade realizarase todas as noites, a partir das doce, nunha antiga goleta atracada no porto deportivo. Só poderán ver o espectáculo “in situ” uns poucos espectadores. Sortearanse as entradas nas emisoras de radio. O resto de público visionarano desde a vela inmensa do barco, na que constitúe unha proxección potente e chamativa.

O Mago Antón tamén ofrecerá o seu espectáculo de escapismo que estrenou en 1990, repetiu dez anos depois e neste emblemático 2010 máxico coruñés reincidirá con este espectacular experimento.

Maxia en estado puro na Coruña. Só queda una asignatura pendente, afirmou o Mago Antón, dar a coñecer que en Galicia a maxia ten moito predicamento. “A maxia debe ter oco na sociedade, seguir avanzando neste senso”. Facer que as cousas imposibles se fagan posibles. Hai que crer na utopía, apuntou.