Os vendedores de coches amósanse sorprendidos do ben que se están a recuperar despois dos meses nos que deberon pechar as portas a causa da crise sanitaria. A venda mantense no mesmo ritmo que hai agora un ano. “A xente está comprando coches” afirma o xerente de Ferrolterra Móvil no polígono da Gándara, José Antonio Sanesteban Bouza. Verdadeiramente non agardaban esta reacción tras a situación vivida e a situación actual. Poderíase explicar, afirma Sanesteban, polas axudas fiscais e polo medo ao contaxio nos transportes públicos. “Se quitamos os meses de peche, poderíase dicir que agora mesmo a venta está a ser mellor en outubro deste ano que no mesmo mes do ano pasado” reitera o xerente do concesionario da Renault-Dacia da Gándara en Ferrol.

Inflúe tamén que as marcas puxéronse as pilas e hai descontos fortes para manter as vendas e recuperarse. Este é un bo momento para mercar coche porque o ano que ven xa non haberá estes beneficios fiscais. No seu caso, o Dacia arrasa. Segue a ser un dos coches máis buscados porque desde 7.900€ tes coche novo e de escaso consumo. No concesionario de Sanesteban están a traballar todos de novo despois de pasar polo ERTE nos meses de peche das instalacións. Outro dato que da boa conta da boa marcha do sector é que no taller mecánico hai moitísimo traballo. “Os clientes están atendendo o mantemento dos seus vehículos por se a situación se agrava e quedan tirados” explica o xerente da Renault.

(Na imaxe, interior de Ferrolterra Móvil S.A. na Gándara)