Unha lancha sairá ás 4 da tarde dende Ferrol ata o peirao de Perlío traendo ás lavandeiras. De Perlío partirán a pé co carro e os enxeos de roupa que terán que lavar no lavadoiro de Emérita, por turnos e mesmo ata a noite. No adro parroquial montaranse uns obradoiros de arte en vivo,  pintura, elaboración de xabrón, taracea e papiroflexia. Detrás da igrexa habilitarase unha carpa para degustar uns liscos e viño.
O traballo das lavandeiras de Sillobre era duro porque empezaba recollendo a roupa da xente de cartos en Ferrol o domingo e remataba devolvéndoa á semana seguinte. A recreación do traballo das lavandeiras levaráse a cabo o sábado cinco de xullo pola tarde baixo a dirección do grupo "Ti e máis eu teatro". Organiza a asociación Mesturas coa colaboración da Asociación Veciñal de Sillobre, a sociedade Agarimo, o Concello de Fene e Radio Fene.