Expositores que representarán a diversos sectores como a náutica, o textil, a alimentación, o automóbil, as enerxías renovables, os mobles, a construción ou a maquinaria agrícola. Uns stands aos que se sumarán outros de diferentes asociacións, colectivos e institucións da comarca. 

Como novidade nesta edición de Expo Ordes, o recinto feiral contará cunha zona adicada ao mundo da discapacidade. Espazo no que se darán cita diferentes asociacións e colectivos relacionados co mundo da discapacidade, así como empresas adicadas á prestación de servizos e elaboración de productos neste ámbito.Nesta zona, ditas asociacións informarán sobre o seu traballo coas persoas que sofren algún tipo de diversidade funcional, así como se darán a coñecer os diferentes tipos de discapacidades a todos os asistentes. 

A apertura do recinto feiral de Expo Ordes terá lugar mañá venres ás 20 horas nunha xornada que estará adicada aos empresarios e autónomos locais. O sábado o recinto abrirá as súas portas dende as 10 ás 21 horas na que todos os asistentes poderán visitar os stands nos que estarán instalados as mellores e máis importantes empresas tanto a nivel local como comarcal e autonómico. 

A xornada do domingo será unha das máis esperadas coa celebración da XXII Festa do champiñón. Unha festa que contará cunha degustación gratuíta do producto nos establecementos hosteleiros do municipio, para a que o Concello repartirá arredor de 10.000 kilos de champiñóns.