Des-Amparo é o nome da exposición. Des é a negación, o inverso. Amparo é o refuxio, o coidado, pero tamén era o nome de pila da avoa de Laura Bouza, falecida hai un ano. Antonio López quedou viúvo e por iso o seu retrato en soidade é o que fecha a mostra na Casa da Cultura de Fene.
Os materiais tamén falan na exposición porque se usa o esparto e a escaiola, materiais vencellados á terra. A persoa deixa de ser ela cando padece unha doenza como o alzheimer. A mostra que se pode ver na Casa da Cultura de Fene fala dunha experiencia biográfica.
Trátase dunha exposición conceptual que se abre cos retratos do tataravó, bisavó,a avoa e da propia Laura Bouza. Logo reprodúcese a evolución do Alzheimer contando as fases da enfermidade. Todo remata coa soidade do seu avó tras o falecemento de Amparo. A mostra pódese visitar ata finais deste mes na Casa da Cultura de Fene.