A remunicipalización do servizo de auga é a alternativa que defende o BNG de Fene diante do fin do contrato con Viaqua despois de 25 anos xestionando o servizo neste concello. Falamos desa postura dos nacionalistas e doutros asuntos da actualidade local con Juventino Trigo no programa As Foxas de Radio Fene. Trigo di que non recibiu as sentenzas xudiciais en torno á Moción de Censura ao seu goberno, porque quen as presentou foi o Concello e non o BNG. Dalle a volta aos argumentos do PP e Somos Fene, afirmando que eles empezaron xudicializando este caso e presentando as demandas.

O voceiro nacionalista entende que o PP non apoie aos encausados pola ocupación simbólica do Pazo de Meirás porque "non se deu desprendido do franquismo" afirma Juventino Trigo quen informa a Somos Fene - que tamén se abstivo neste asunto- que centos de feneses tiveron que aportar diñeiro para o regalo do pazo ao Caudillo e que un fenés está entre os encausados. As contas tampouco lle cadran ao BNG cando o goberno do PP-Somos Fene di que non debe nada e ve moi necesario que se presenten os Orzamentos de 2019 manifestou Trigo, para ver se así se corrixe a "falta de transparencia" do bipartito. Sobre as obras que empezan a verse, como o alumeado público de San Valentín, afirma o portavoz do Bloque que foi o seu goberno quen iniciou os trámites. De todo isto e doutros asuntos fala Juventino Trigo no espazo As Foxas.