Tras despachar á oposición política, desbotou manifestarse verbo da Real Academia Galega, que prepara unha resposta negativa ao borrador das linguas no ensino non universitario. “Teño á Academia na máis alta consideración”, limitouse a dicir. Seguidamente, defendeu a necesidade de aprender inglés para que “os nenos galegos sexan europeos do século XXI” e cando se lle preguntou se el predicaba co exemplo, recoñeceu que non fala o idioma anglosaxón. Núñez Feijóo laiouse de non ter de pequeno ese privilexio que el quere ofrecer gratuitamente a todas as familias, e non só ás que teñen cartos, entre as que volveu a citar, como a pasada semana “aos nacionalistas”, dos que dixo que mandaban aos seus fillos a estudar ao estranxeiro. Asemade, foi o seu dominio do inglés, revelou, un dos requisitos que lle fixeron escoller como conselleiro de Economía a Javier Guerra.