O Concello de Cotabade, en colaboración da Asociación de Gaiteiros Galegos, impulsou a conversión en museo dunha antiga escola unitaria recentemente restaurada. As novas instalacións non só acollerán numerosas gaitas antigas, senón tamén outros instrumentos musicais que as adoitan acompañar, como tambores, bombos, clarinetes, frautas ou requintas cedidos por varios coleccionistas. Asemade, contará cunha exposición de fotografías antigas relacionadas coa gaita e os gaiteiros, así como recursos multimedia que explican a historia e construción de todos instrumentos musicais galegos. Unha segunda mostra está dedicada á figura de Ricardo Portela, presidente de honra da Asociación de Gaiteiros Galegos e considerado un dos grandes referentes dos músicos de raíz da nosa terra.