“Sempre é unha alegría volver a casa”, di esta exalumna do IES de Fene de impresionante curriculo académico. Fixo traballos de investigación centrados no estudo cualitativo de sistemas dinámicos e ecuacións diferenciais e é quen de explicalo. “Calquera cousa que evolucione no tempo pódese representar cun sistema dinámico”. Por exemplo, “con ecuacións diferenciais tense estudado como ía ser a evolución da pandemia, cantos infectados ía haber en cada momento, ou como evolucionan un depredador e unha presa que coexisten, nun mesmo ecosistema, ou a coexistencia de dúas línguas nun territorio”.

“As Matemáticas son o meu traballo, non as calificaría de divertidas, pero eu prefiro estudar Matemáticas que Historia”. Moitos estudantes senten ansiedade cando se enfrontan ás Matemáticas, segundo o informe PISA, contaxiados ao parecer polo que lles transmiten familia e profesores. “Hai unha tendencia a pensar que son algo difícil, unha crenza de moita xente que pode influir”, opina Erika Diz Pita.