Jorquera amosou a preocupación do BNG de cara a última fase do apagón analóxico, xa que “existen unha serie de problemas que aínda non teñen unha solución clara e definida. En concreto, refírome ás denominadas “zonas de sombra”, lugares aos que non pode chegar a TDT, como é o caso de 7.000 habitantes da provincia de Lugo, aproximadamente o 2% da poboación, que non poderán sintonizar a TDT”.

A proposta de sinal vía satélite ten custes e implica estar un tempo sen tv

O deputado nacionalista recoñeceu que unha das posíbeis solucións que se manexan é a de transmitir o sinal vía satélite, “pero os afectados terán que estar durante un tempo sen poder ver televisión, posto que non se pode solicitar a colocación das antenas até que non se produza o apagón. Sen esquecer que terá custes para eles”. Por esta razón, Jorquera pediu a concesión de subvencións ou axudas para os que están nesa situación.

O parlamentario apelou ao Plan de Actuacións de Apoio a colectivos con risco de exclusión nos Proxectos de Transición da Fase I do Plan Nacional de Transición. “Un Plan que ten por obxecto a posta en funcionamento de mecanismos de información preferente, protección e especial atención dirixidos aos integrantes dos colectivos que presentan especial risco de exclusións no proceso de transición tecnolóxica”.