O barco museo Raíña do Carme ofrece ao visitante unha atención especializada cun técnico que o mergulla na infinidade de aparellos vencellados ao mundo da pesca. Os turistas poden participar no seu funcionamento, nas súas tecnoloxía de comunicación e incluso no seu balanceo.

O atractivo deste museo reflíctese en cifras. 8.500 persoas visitaron o barco o ano pasado, chegándose a rexistrar 150 visitantes nun só día, sinalou en Radiofusión o concelleiro de Turismo de Burela, José González Legazpi. Só hai que achegarse ata Burela para visitalo. No caso de colectivos, grupos ou colexios deberán chamar ao Concello, a Axencia de Desenvolvemento Local ou á Oficina de Turismo desta localidade lucense.

González Legazpi destacou a situación estratéxica e privilexiada de Burela, no medio da mariña lucense, á hora de atraer turistas. Ás tres praias con bandeira azul, o Mirador Monte Castelo, a igrexa gótica do século XV, súmase este peculiar museo.

Durante o verán pódese visitar de 11 da mañá a 2 da tarde e de cinco e media da tarde a nove e e media da noite. No inverno só en horario de mañá.Toda a información do barco en www.expomar.com.