Estes 278 mil euros posibilitarán o cofinanciamento dos servizos sociais que reciben os municipios da Mancomunidade ordense. Servizos como: 
- o programa de “Educación en igualdade” (para fomentar a igualdade de xénero); o de “Educación Familiar” (educación viaria para nenos, recollida de xoguetes, programa de educación para o axeitado desenvolvemento familiar...)
- o “Programa de Emprego” (elaboración de censos empresariais e asesoramento/orientación sobre a busca de traballo)       
- o “Programa de Prevención e Consumo de Drogas” (que inclúe a prestación dos servizos de información, orientación e asesoramento nesta problemática)
-  o “Programa de asesoramento xurídico” (dirixido especialmente a inmigrantes, inmigrantes retornados)
- o “Programa de Educación Temperá” (que inclúe actuacións para mellorar o desenvolvemento cognitivo, afectivo e de linguaxe de nenos de 0 a 6 anos e rapaces con discapacidade)
- o “Programa de Apoio á Persoa” (que inclúe asistencia e asesoramento a persoas maiores de 6 anos con demanda psicolóxica)
- o “Programa de Axuda a Domicilio”, (que beneficia directamente a uns setenta veciños e veciñas de Frades, Oroso e Ordes)

Inmigración

Así mesmo, o pleno da Mancomunidade de Municipios da Comarca de Ordes recibiu tamén confirmación da concesión dunha axuda de 2.666 euros da Secretaría Xeral de Emigración para o programa de integración de inmigrantes e emigrantes retornados, que leva funcionando con éxito na comarca ordense os últimos tres anos. Unha axuda moi alonxada dos 15.000 euros recibidos nas anualidades anteriores, polo que os alcaldes da comarca de Ordes acordaron unanimemente solicitarlle á Secretaría Xeral de Emigración unha revisión do expediente ou a sinatura dun convenio de colaboración para poder manter este importante servizo nunha comarca que conta cun censo de máis de 1.150 estranxeiros de case medio cento de nacionalidades distintas.