A XGL tamén aprobou un lote de facturas de provedores correspondentes aos meses de marzo e abril por un montante total de 119.891,66 euros, de maneira que o consistorio se pon completamente ao día na tramitación dos pagos correspondentes a este ano. Cómpre lembrar, ademais, que no último pleno tamén se aprobou o recoñecemento doutros 770 documentos -case todos de 2019- que xa se están facendo efectivos nestes días.

O outro grande apartado de investimento municipal refírese ao apartado viario. O órgano de goberno deulle luz verde á licitación do aglomerado e os servizos da pista entre Os Regueiros e a Visura, en Sillobre -148.550 €-, á pavimentación con este mesmo firme da vía que une Fene con Magalofes pasando por Lubián -112.399 €- e ao reforzo con aglomerado do camiño da Lomba, en Barallobre, cun importe de saída de 104.833 euros. Estes tres proxectos publicaranse no BOP e no Perfil de Contratante municipal a semana que vén, co que as empresas interesadas poderán empezar a presentar as súas ofertas técnicas e económicas.

Tamén sairá publicado na plataforma de contratación o primeiro dos proxectos no cemiterio, cuantificado en 253.797,03 euros procedentes do POS+ 2019. Construiranse 126 columnas con tres nichos máis un cinceiro funerario cada unha, o que supón ampliar en 378 sepulturas a capacidade do camposanto municipal, situado en Barallobre. Trátase dunha obra "moi demandada pola veciñanza" que, en palabras do alcalde, Juventino Trigo, "xa levaba tempo de máis agardando a que se dese un paso decidido para levala a cabo. Agora coa licitación do contrato por fin se pon en marcha".

O Executivo local agarda que á volta duns días tamén se leve á Xunta de Goberno o inicio do expediente de licitación para a preparación das instalacións cun novo pavimento, mobiliario, espazos axardinados, dous módulos columbarios e equipamento para a incineración de restos dos nichos. Este segundo proxecto ascende a 230.795 euros e financiarase integramente con fondos municipais.

Segundo comentou Juventino Trigo, todos estes proxectos "veñen cubrir servizos básicos para a cidadanía" e, por outra banda "contribuirán na súa medida ao mantemento do emprego e a reactivación económica".