Manuel Fraga accedeu ao estrado en penúltimo lugar, antes do actual presidente do PPdeG, e, entre os recordos á súa vida na vila e as súas orixes familiares, loubou ao candidato de Os Peares, ao que cualificou como “o home ideal” para “gañar as eleccións”. Fraga tamén recordou a recente folga de xuíces, produto, segundo el, da “incompetencia de algúns”, así como a polémica polo emprego da lingua. “Nós somos galeguistas e defendemos ao galego, pero non somos extremistas, nin apedreamos a xente en manifestacións que piden unha Galicia bilingüe”, dixo o ex presidente da Xunta.
A continuación foi Alberto Núñez o que tomou a palabra para facer balance dos catro anos de goberno bipartito, ao que acusou de dilapidar todo o logrado polos anteriores gobernos. “No ano 2005 deixamos a mellor Galicia posible, cun paro por debaixo do 8%, con récord de afiliados á Seguridade Social, con autovías e o proxecto do Ave avanzado. Hoxe hai 45.000 parados máis e todos os sectores metidos en problemas”, estimou Feijóo. O líder popular tamén cargou contra a política agraria da Xunta, á que culpou “do peche de 3.000 explotacións, de que o litro de leite e a cría de gando estea por debaixo dos custes de produción e de que sexa cada vez peor vivir do campo”.
O candidato do PP pediu transparencia para o voto da emigración e prometeu a supresión do imposto de doacións, os pagos aos grandes dependentes, mais axudas para que os menores de 35 anos teñan acceso á vivenda e a baixada dos impostos ás empresas.
Tamén houbo quenda para a número un das listas por Lugo, Raquel Arias, que reclamou mais atención para as persoas maiores, que “non merecen o trato que están a recibir”. Para elo pediu que se melloren as condicións económicas da lei de Dependencia e gastar menos en “despilfarros, coches, mobles e despachos”. Outro dos puntos fortes da súa intervención foi a súa acusación de “adoutrinar aos nenos coas galescolas” e da falta de apoio para os mozos, “coa retirada de plans como o labora ou as axudas para a vivenda”. No tocante á sanidade, Arias prometeu reducir as listas de espera a 60 días para unha consulta e 45 para una operación.
Xosé Manuel Barreiro falou de gastos “inmorais” ante a crise económica “que está a sufrir Galicia”, sobre todo cando “hai 50 persoas que cada día se quedan sen traballo en Lugo”. Para solucionar as dificultades económicas aportou como receitas “a contención, a rebaixa dos impostos e o realismo”.
Pola súa banda, Agustín Baamonde rexeitou que o seu partido promova a abstención e indicou que son “os socialistas e o bloque os que levan a desmobilización, porque non lles irán a votar nin a súa xente”. O número 4 por Lugo tamén quixo facer un balance negativo do bipartito, que deixou a Galicia “chea de caciques, de montes queimados, con 200.000 parados e coa peor sanidade e a peor educación de Europa”. Por último, Xerardo Criado, alcalde de Vilalba falou da necesidade de “carretar á xente”e de “traballar duro” para “sacar a estes dous do goberno”.
