O traballo de Monicreques de Kukas caracterízase por contribuír á dignificación do teatro de marionetas coidando a presentación dos espectáculos tanto dende o punto de vista formal como no argumental e textual. En 7 contos capitais fan unha reflexión sobre as miserias e debilidades humanas sempre desde un punto de vista de humor ácido, co que se recupera un dos aspectos máis tradicionais do teatro con marionetas, o seu carácter de crítica e sátira social. Sete historias nas que a avaricia, a luxuria, a preguiza, a envexa, a luxuria, a soberbia ou ira dos personaxes vanse entrelazando ofrecendo ao espectador unha visión satírica e grotesca destes.

Ademais, tamén investigan na creación e construción de novos prototipos de marionetas que conxugan diferentes técnicas de manipulación que permiten montar espectáculos de gran formato. Promocionan o teatro de marionetas con exposicións, publicacións de textos e unidades didácticas, catálogos, gravacións para a televisión, conferencias ou cursos de iniciación para nenos, mestres ou de especialización para profesionais. De feito, desde o venres 27 ao domingo 1 de marzo Expocoruña acollerán unha exposición de marionetas de Monicreques de Kukas na Mostra de Artesanía.

As entradas para asistir á representación no Teatro Colón poden adquirirse na billeteira de Caixa Galicia (www.caixagalicia.es) ou no teléfono 902 42 44 43 a un prezo de 5 euros. A xira recén comeza na cidade herculina xa que o 6 e 7 de marzo estarán no Teatro Principal de Compostela, e o 14 de maio no Auditorio Municipal de Ourense. Canda a esta obra, Kukas ten en cartel Un agasallo para Xaquín, Sen título 4x8x6 e Contos do vento acatarrado.