“Invisible Darkness”, unha xilografía en papel Migieshi montada sobre papel Arte a dúas tintas, é a peza que encabeza esta mostra do “III Premio Internacional de Artes Gráficas Jesús Núñez”. A obra, da xoven artista madrileña Eva Santín, foi seleccionada por unanimidade do xurado como a gañadora de certame. Pero tamén se amosan na exposición os dous accesits concedidos no concurso: “Series continentes. La hilandera”, unha xilografía á auga con impresión dixital sobre film, de Alicia Candiani, e “Retrospectiva”, grabado en plástico a unha tinta, de Alberto César Lavera. Xunto a elas, o xurado do certame seleccionou outras vintesete obras que tamén se recollen na exposición, incluídas as dos galegos Alberto Fojo, Cristina Brea, Anne Heyvaert e Xosé Poldras.

Segundo o comisario da mostra, Pedro Galilea, o “Premio Interncional de Artes Gráficas Jesús Núñez” é unha iniciativa da Deputación da Coruña coa que se pretende “apoiar a creación no campo das artes gráficas, ademais de recoñecer o labor do fundador do Centro Internacional da Estampa Contemporánea de Betanzos”.