Cándido Pazó, un dos narradores galegos máis importantes da actualidade, deleitará ao público con historias mariñeiras sobre portos, tabernas, barcos, encallamentos, etc. Actuará este venres na rúa Carmen Curuxeiras, a partires das 22.00 horas. As sesións de contacontos son, precisamente, unha das grandes novidades do ciclo este ano. Con elas, preténdese “darlle voz, memoria e humor ao mar”.

Á marxe de narracións e concertos, o ciclo de Músicas Portuarias acolle novamente paseos musicais en barco pola ría de Ferrol con dúos locais tocando a bordo. Os participantes neles terán a oportunidade de contemplar os castelos de San Felipe a A Palma, as baterías da Graña, as ruínas de San Cristovo, a bocana da ría, O Seixo, Barallobre ou os estaleiros. As viaxes serán de balde, ata completar as prazas, e estarán amenizadas por Antón Varela, Raquel Fontes, Comisa Bal e Os Xotas.

A programación inclúe así mesmo unha mirada ás músicas que se fan na actualidade no Mediterráneo. Estas chegarán a Ferrol da man da agrupación valenciana Artaica e de Franca Masu. Artaica subirá ao escenario do Teatro Jofre o 10 de xullo. Os seus integrantes, Xavi Folch (contrabaixo), Pau Viguer (piano), Agustí Vidal (violino) e Mara Aranda (voz) ofrecerán ao público un repertorio con melodías ricas en mistura e anos de intercambio de experiencias nas vilas de ribeira. O custe da entrada é de dez euros e xa pode adquirirse a través da web www.ferrol.es/jofre.