Durante esta xornada de traballo realizarase unha presentación do proxecto Marleanet, unha mesa de debate que versará sobre os recursos para unha difusión sinxela e eficaz da nova lexislación aplicable ao sector marítimo. Ademais realizaranse dous obradoiros, un deles sobre a plataforma Marleanet como soporte para a formación marítima e outro sobre o manexo de ferramentas innovadoras para a formación marítima. 

O proxecto Marleanet no que colabora o Cetmar persegue a mellora da formación marítima no espacio Atlántico e a creación dunha rede de centros de formación que mellore a capacitación dos profesionais do mar e propicie un coñecemento adaptado ás necesidades deste ámbito e da seguridade marítima, así como un achegamento entre a formación marítima civil, pesqueira e militar. Esta iniciativa está coordinada polo Centre Européen de Formation Continue Maritime (CEFCM) de Concarneau (Francia) e ademais do Cetmar conta coa participación do Cork Institute of Technology de Irlanda, a Escola Superior Náutica Infante D. Henrique e a  Mutua dos Pescadores de Portugal, e a Universite de Bretagne Occidentale (Francia); conta coa cofinanciación da Unión Europea mediante fondos FEDER do programa espacio Atlántico.  

Todos eles traballan de forma conxunta dende ano 2010 na execución de accións encamiñadas á creación dunha rede transnacional de formación marítima de alta calidade e á posta en común de ferramentas para os seus membros. O proxecto prevé tamén o intercambio de boas prácticas e de persoal para a implantación conxunta de cursos de calidade e a posta en marcha dunha ferramenta común de e-learning que inclúa aos socios da rede cara a formación on-line (a bordo de buques ou na casa) e nos centros de formación. A meta dos socios de “Marleanet” é capacitar a arredor de 3.000 persoas ao ano a través dos centros da súa rede, e certificar o valor engadido da formación marítima impartida no espacio Atlántico.