Para as mesmas datas está programado o curso titulado “Estratexias cidadás para tempos de crise”, unha novidosa temática que ten como obxectivo analizar os efectos que sobre o urbanismo tivo a crise económica e reflexionar sobre as estratexias que cómpre seguir para reconducir a forma e a vida urbanas a partir da situación presente, desde o punto de vista da xestión ambiental e social da arquitectura e da paisaxe urbana. O curso celebrarase no FORUM Carballo - Casa dos Oficios desta localidade, e está organizado pola Escola Técnica Superior de Arquitectura da Coruña.

Tamén na primeira semana de xullo, entre os días 4 e 6, celebrarase na Facultade de Ciencias da Educación do campus de Elviña un obradoiro do chamado Teatro do Oprimido para a Transformación  Social e Educativa, que se presenta como unha metodoloxía que a través de xogos, exercicios e técnicas teatrais procura a desmecanización física e intelectual dos participantes, estimulando a busca de alternativas para a vida cotiá.