O BNG rexistrou unha enmenda á totalidade do proxecto orzamentario despois de que a conversa mantida esta mesma semana por José Antonio Alonso e Francisco Jorquera non propiciase nin unha pequena aproximación entre Goberno e nacionalistas galegos, cuxo apoio fora decisivo nos Orzamentos de 2009. O propio Jorquera xustificou o “non” do BNG pola “fiscalidade regresiva, especialmente no que atinxe ao incremento do IVE que penaliza ás rendas máis baixas; porque non se cubren as necesidades de Galicia no financiamento dos principais proxectos; e, finalmente, pola pouca dotación en políticas sociais e a falla de vontade no cambio do modelo produtivo”. O representante nacionalista xa adiantara en Radiofusiòn o sentido do voto, criticando con dureza a reforma fiscal.