A xornada comeza ás 11.00 horas cunha pequena charla informativa a cargo de Ramsés Pérez, de ADEGA, e a continuación terá lugar o obradoiro no taller de maquetas da Escola de Arquitectura. Unha vez feitas as caixas procederase a penduralas nas árbores do Campus de Elviña e posteriormente realizarase un seguimento das mesmas.

Esta actividade vén motivada porque a tala dos bosques autóctonos e a substitución por monocultivos, así como a retirada das árbores vellas dos montes, provocan a desaparición de multitude de buracos necesarios para que moitas especies de animais nidifiquen ou se refuxien. A construción de caixas niño e outros abrigos para a fauna (paxaros, mamíferos, anfibios...) contribúe a paliar este impacto favorecendo á biodiversidade.

Por outra banda, a construción de refuxios contribúe a reutilización, xa que para elaborar unha caixa niño ou calquera outro refuxio non se precisan grandes investimentos, nin ferramentas sofisticadas, nin mercar madeiras que contribúan á tala de máis árbores.