Grazas a esta escola de verán, as familias poderán deixar aos pequenos durante as mañás de vacacións para a realización de diferentes actividades. Unhas actividades que buscan que os nenos e nenas vexan, descubran e participen do entorno no que viven durante as vacacións, mentres a súa familia traballa ou descansa. Ademais con este programa preténdese axudar aos pequenos ordenses a convivir, facer amizades, reciclar dun xeito divertido, coidar do entorno, coñecer diferentes culturas, facer deporte e tratar con igualdade e respeto a outros nenos. 

Estas actividades estarán dirixidas aos nenos e nenas escolarizados nalgún dos centros educativos do municipio en educación Infantil ou Primaria durante o curso 2009- 2010. O Concello porá a disposición dos participantes un servizo de transporte gratuíto para os nenos e nenas que vivan nas parroquias, deseñándose as rutas en función das persoas inscritas en cada quenda. 

O programa desenvolverase durante os meses de xullo e agosto e está dividido en quendas de 15 días cada unha, podendo inscribirse en unha, dúas, tres ou nas catro quendas das que se compón o programa. A primeira destas quendas irá do 1 ao 15 de xullo, a segunda do 16 ao 30 de xullo, a terceira do 2 ao 13 de agosto e a cuarta do 17 ao 31 de agosto. 

As prazas son limitadas e a admisión realizarase por orde de inscrición. O prazo para inscribir aos rapaces estará aberto ata o 25 de xuño no departamento de Educación, Mocidade e Discapacidade do Concello de Ordes, onde tamén se poderá recibir máis información.  

As actividades darán comenzo ás 9 ata as 14 horas, tempo no que os pequenos poderán disfrutar con xogos, diferentes tipos de obradoiros, visitas á piscina e demais entretementos. Os rapaces poderán chegar ata as 9:30 horas e sair a partir das 13:30 horas. 

En canto aos prezos, a participación nunha soa quenda terá un prezo de 16 euros, a participación en dúas quendas (1 mes) costará 32 euros, en tres quendas (mes e medio) terá un coste de 48 euros, e a participación nas catro quendas (2 meses) costará 64 euros. As familias numerosas gozarán dunha bonificación do 50%, debendo presentar o carné de familia numerosa.  

Silvia Marín, explicou que desta maneira o Concello pretende facilitar a conciliación da vida laboral e familiar das familias ordenses, que se encontran cun problema para poder coidar aos seus fillos cando estes están de vacacións, ademais de facer que os pequenos disfruten con xogos e demais actividades que compartirán con outros rapaces da súa idade, contribuindo así tamén á súa socialización.