O éxito do LAV 010 está asegurado logo de que se anotasen case 200 persoas, o que supón triplicar o número de asistentes da edición anterior. En dez dos 16 cursos ofrecidos se esgotaron todas as prazas dispoñibles. Estes datos converten o Laboratorio nunha iniciativa de referencia en Galicia no eido da formación audiovisual. Os cursos desenvolveranse os días 20, 21, 27 e 28 de febreiro no CPI de Vedra, na comarca de Santiago. A proposta de cursos atende a diversos procesos da creación audiovisual, desde a dirección, o guión e a actuación aos máis técnicos, como o manexo de cámara, o son ou aspectos da posprodución.
Esta fin de semana comeza o curso de iniciación á creación de curtametraxes, que imparte Alfonso Zarauza, director do filme A noite que deixou de chover e da serie Nordés. Tamén comeza o de iniciación aos documentais, a cargo do realizador Antón Moure e o que ofrece Juan Pablo Echeverry, candidado ao Goya polo seu traballo Minotauromaquia, sobre a técnica de animación stop-motion.
Dous obradoiros de interpretación diante da cámara comezan tamén esta fin de semana, o impartido pola actriz galega María Bouzas e o do británico Nathan Carter: ao igual que comezan as clases de maquillaxe de efectos especiais, con Alberto Hortas, que formou parte do equipo do filme O labirinto do fauno, de Guillermo del Toro. Na fin de semana do 27 e 28, Denís López Horro será o encargado de ensinar como se fai un guión audiovisual. Xoán Escudero de explicar o uso de son creativo para cine; Javier Rosende de compartir os seus coñecementos de operador de cámara; e Paco Rocha de ofrecer un obradoiro de iniciación á dirección de fotografía.
Para aqueles que xa teñen experiencia no audiovisual, o LAV 010 ofrece obradoiros ‘avanzados’, coma o de codificiación de vídeo dixital, que será impartido por Berto Yáñez; ou o de Red ONE, da man de Alberto Díaz “Bertitxi” e Jairo Iglesias. Os que queiran mellorar a técnica vocal e voz falada, poderán adquirir bos consellos de Ramón Bermejo. Os interesados en empregar as steady cam recibirán clases de Carlos Martínez Bouzas, e Alonfo Parra (AEC) ofrece un curso de dirección de fotografia para directores e realizadores. Todos estes cursos avanzados realizaranse nesta primeira fin de semana, agás o de steady cam, que será na última fin de semana de febreiro.
Este ano o LAV engade tamén unha nova proposta formativa, dirixida á xente máis nova: un obradoiro audiovisual para alumnos de educación secundaria. Trátase dun curso de iniciación ás curtametraxes que vai impartir ao longo destas dúas fins de semana Luki Mathews.
Mostra audiovisual
A primeira sesión será o sábado 20, ás 20:30 horas, e nela presentaranse traballos realizados en edicións anteriores do LAV: as curtametraxes Sospeitosa, Baixo Sospeita, Slow Food I e Slow Food II e o documental Meigawatios.
O día seguinte, domingo 21, ás 18.30 horas, haberá unha sesión dedicada ó ‘making off’ na que o director Marcos Nine dará unha conferencia sobre ‘Recursos para contar o que non podes gravar’ e, despois, contaremos coa presenza de Enrique Otero e Miguel de Lira que nos falarán da longametraxe e exhibirán o making off de Crebinsky.
O venres 26 de febreiro, ás 21:30 h. proxectaranse nove curtametraxes realizadas por ex alumnos do LAV e por directores de Vedra, Compostela e arredores, entre os que figuran Orlando Villasenín e Luís Miguel Lagos ‘Luki’, Nani Matos, Edu Lavandeira, Marisa Otero, Pepón Tallón ou Gutier Rolán.
O sábado 27, ás 20.30 horas, haberá unha sesión de autor na que se proxectará a película A noite que deixou de chover, de Alfonso Zarauza, mentres que o último día do LAV 010, o domingo 28.
