O Día Internacional das Mulleres Rurais coincide coa publicación no Boletín Oficial do Estado da regularización do rexistro de titularidade compartida das explotacións agrarias. A presidenta en Galicia da Federación de Mujeres Rurales (FADEMUR), Rosa Arcos, asegurou en Radiofusiòn que se trata dunha “gran nova” porque supón “un novo paso cara á normalidade”. Tras esta acción do Goberno central, serán agora as Comunidades Autónomas as que terán que desenvolver os mecanismos que farán posible a cotitularidade. Non obstante, Rosa Arcos entende que, máis aló dos procedementos legais, o máis importante agora é que muden as mentalidades. Argumenta que resulta preciso concienciarse de que en moitos casos as explotacións agrogandeiras son un negocio da parella e, xa que logo, homes e mulleres deben compartir os beneficios administrativos e económicos.

Outros asuntos que preocupan ás agricultores e gandeiras son a necesidade de dotar de servizos ao rural galego, os problemas de acceso ás novas tecnoloxías ou o atraso da aplicación da Lei da Dependencia.