O pan da pandemia

O pan da pandemia
05 de Xuño, 2020 - 10:44 h. | Publicada por Radio Fene

O confinamento, a causa da alarma sanitaria, provocou en Dolores Sanfíz a aprendizaxe do pan, todo un motivo de ledicia como nos conta nesta entrevista. 

ESCOITA O PODCAST:

Sempre nos andamos preguntando qué cousas boas nos deixará a experiencia do confinamento vivido durante a alarma sanitaria. Como colectivo, temos falado dalgunhas pero a nivel individual seguro que cada quen ten unha historia propia. Imos contar a experiencia de Dolores Sanfiz Raposo, unha galega en Barcelona que nos últimos meses se encontrou co pan artesán. A historia remóntase ao ano 2003 cando chega a Barcelona e descubre que alí o pan é malísimo, nada que ver co galego, aínda que recoñece que hoxe en día as panaderías da cidade condal melloraron moito. Cada vez que viaxaba á Coruña, volvía cun pan galego na maleta.

“Hai tempo que tiña ganas de facer pan pero nunca tiña tempo” afirma Dolores quen atopou no confinamento a disculpa perfecta para poñerse mans á masa. O primeiro foi informarse a través da rede, lendo e vendo vídeos tutoriais. Entre todos eles, recomenda os de Beatriz Echevarría, de “El horno de babette” e  o de Ibán Yarza, gran experto e autor de libros como "Pan de pueblo". Recoñece Dolores Sanfiz que “un motivo de ledicia en pleno confinamento foi aprender a facer pan”.

 

O pan do que nos fala é un pan de masa madre, un pan de calidade, que antes da alarma sanitaria xa procuraba nas panaderías. Utiliza fariñas de calidade e integrais, ás veces mesturadas con fariña branca de trigo. Precisamos fariña, auga e masa madre. Durante 30 minutos deixanse reposar nun bol e ao final se lle engade o sal. Mesturase todo ben, amasando só o necesario. Noutro recipiente, untado con aceite, métese a mistura que se deixará fermentando durante unha hora. Por último introdúcese no frigorífico durante toda a noite. Á mañá retírase e deixase atemperar antes de darlle a forma, nas pezas que desexemos.

“Desde o principio saíume rico pero co tempo vou conseguido un pan máis esponxoso” . Esta panadeira ocasional coce cada catro ou cinco días porque este pan dura fresco. Pódese cortar en racións e conxelalo, segundo as necesidades de cada quen. Isto non quita que mesmo poida viaxar á Coruña, cousa que está desexando, se reencontre co pan galego.

Barcelona entrará probablemente o luns na segunda fase da desescalada e Galicia na terceira. Todo fai pensar que o reencontro co pan do país e coa familia se produza, segundo as súas contas, a finais de xuño ou primeiros de xullo. Aquí a agarda o mellor pan do mundo.

Cultura

Publica o teu comentario agora