A idea procede dun informe elaborado na provinicia de Pontevedra e que se estenderá ao resto de Galicia no que se revela a existencia dunha rede pouco funcional de cuarteis. Trátase dunha herdanza dos tempos pretéritos nas aldeas, explica Barrio: “Antes estaban cheas de poboación e precisaban dun cuartel porque os axentes mobilizábanse a pé. Mais agora moitas están baleiras e contamos con vehículos, polo que cómpre facer unha reestruturación”.

Coas melloras laborais na Benemérita, que reduciron as horas de servizo, moitas dependencias non cubren todo o horario que demanda a cidadanía. Xa que logo, a Unión de Gardas Civís resolve que se eliminen redundancias como as que existen no arco Arzúa-Ulloa, con catro cuarteis en treitos de menos de 20 quilómetros de separación. Os axentes mobilizaríanse en vehículos dende unha dependencia central que tería horario completo ao concentrar máis axentes e cada mañá farían rolda por oficinas de atención que poderían estar nos consistorios.