Mais dirán vostedes: “A min, déixateme de lerias e dime se teremos verán ou non”. Pois sostén a Axencia Estatal de Meteoroloxía que si, que o haberá e comezará contra o luns, cando subirán as temperaturas e o ceo estará máis despexado. Di a AEMET que teremos un “verán normal” para Galicia, e a partir de aí que cadaquén interprete o que queira. Pero xa lles digo eu que iso vén dicir que irá unha temperatura agradable polo norte do país, algo máis calorosa polo sur, non faltarán as néboas e, como non, algún día ha chover. Por iso de non perdermos o hábito.

A sorte está botada e, dende logo, aínda son moi libres de ir esta próxima noite de San Xoán a saltar as cacharelas co paraugas na man e pasar a nova estación do ano co chuvasqueiro ao carón do traxe de baño.